قوستاناي مەملەكەتتىك پەداگوگيكالىق ينستيتۋتىندا وسىدان بىرەر جىل بۇرىن قازاقستان حالقى اسسامبلەياسى كافەدراسى اشىلعان بولاتىن.
ەلباسى ساياساتىن ناسيحاتتايتىن, قازاقستانداعى دوستىقتىڭ, تاتۋلىقتىڭ ناعىز ۇلگىسىن كورسەتەتىن كافەدرا قىزىقتى شارالاردىڭ ورتالىعىنا دا اينالعان. نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسى ستۋدەنت جاستارعا ايقىن جۇمىس باعىتىن مەڭزەدى. ماقالادا ايتىلعانداي, «تۋعان جەر» باعدارلاماسى ءبويىنشا وڭىر تاريحىن, تۇلعالارىن ءبىلۋ, ۇلتتىق ءداستۇردى, سالت-سانانى جاڭعىرتۋ, وعان ۇلەس قوسۋ كافەدرا جۇمىسىنىڭ باعدارىنا اينالدى. وسىعان وراي كافەدرا ينستيتۋتتا قازاقستان حالقى اسسامبلەياسىنىڭ مۇشەسى, اقىن, قر ءبىلىم بەرۋ ءىسىنىڭ ۇزدىگى, ارداگەر ۇستاز الەكساندرا سۋسلوۆامەن كەزدەسۋ وتكىزدى.
كەزدەسۋدە الەكساندرا يلينيچنا ءوزىنىڭ شىعارماشىلىعى جونىندە, ولەڭگە قالاي كەلگەنىن, ءومىر جولىن اڭگىمەلەپ بەردى. سونىمەن قاتار ولەڭدەرىن وقىدى. ول بۇگىندە «سولنتسە نا رەسنيتسە», «پريكوسنوۆەنيە», «ريابينوۆىي پريۆكۋس», «س كەم پوۆەدەشسيا», «داۆاي درۋجيت» اتتى كىتاپتاردىڭ اۆتورى. الەكساندرا يلينيچنانىڭ قازاقستان, تۋعان جەر, تابيعات, قازاقتار ءداستۇرى تۋرالى پاتريوتتىق جانە بۇلدىرشىندەرگە ارنالعان ولەڭدەرى جاستاردىڭ ىستىق ىقىلاسىنا بولەندى.
«مەن باقىتتى اداممىن. قازاقستانعا ەكى جارىم جاسىمدا كەلگەن ەكەنمىن, ءوستىم, ءوندىم, ءبىلىم الدىم, ۇستاز, اقىن اتاندىم. ولەڭدەرىمدە رەسەي, سەن كەڭ بايتاقسىڭ, بىراق قازاقستاندى ساعىنامىن, ول – مەنىڭ ءۇيىم عوي» دەگەن وي ايتقان ەدىم», دەيدى اقىن الەكساندرا سۋسلوۆا.
«مۇنداي جاستاردى رۋحاني بايىتاتىن كەزدەسۋلەر وتە قاجەت. جاستار ەكى ساعات بويى اقىن ولەڭدەرى مەن اڭگىمەلەرىن ۇيىپ تىڭدادى, وعان سۇراقتار قويدى. ادەبيەت تە ءبىزدىڭ ۇلتتىق كودىمىزدى, ۇلتتىق تامىرىمىزدى ساقتايتىن قۇرالدىڭ ءبىرى. ەلباسى ماقالاسىندا بۇگىنگى جاستاردىڭ زاماناۋي, باسەكەگە قابىلەتتى ءبىلىمدى بولۋىمەن قاتار, مادەنيەتتىڭ, رۋحاني بايلىقتىڭ دا ماڭىزدىلىعى ايتىلدى. «تۋعان جەر» باعدارلاماسى جاستارعا الدىمەن ۇلتىڭنىڭ, تۋعان جەرىڭنىڭ, ولكەڭنىڭ تاريحىن تۇلعالارىن, شەجىرەسىن, ادەبيەت, مادەنيەتىن تانۋعا مەڭزەيدى. كەزدەسۋ دە جاستارعا وسىنى تۇسىندىرگەندەي بولدى», دەيدى قازاقستان حالقى اسسامبلەياسى كافەدراسىنىڭ مەڭگەرۋشىسى ولگا ەۆدوكيموۆا.
كەزدەسۋدە ينستيتۋت ستۋدەنتتەرى اقىن كەشىن ءان-كۇيمەن ورنەكتەپ وتىردى.
ءنازيرا جارىمبەت, «ەگەمەن قازاقستان»
قوستاناي